Արցախում 10-ամյա երեխայի սպանության դեպքի վերաբերյալ ԼՈւՐԵՐ.com-ին նոր մանրամասներ են հայտնի դարձել: Նախնականտեղեկություններով՝ երեխան սպանվել է 18–ամյա եղբոր կողմից՝ առանձնակի դաժանությամբ։
Ըստ հարազատների պատմածի՝ 18–ամյա պատանին եղբորը սպանել է անտառում, նրան դանակի և պատառաքաղի բազմաթիվ վնասվածքներ հասցնելով, այնուհետև թաղել փոսում, փակել տերևներով, ապա գնացել տուն ու իրեն պահել սովորականի պես: Ըստ որոշ տեղեկությունների՝ սպանությունը կատարած երիտասարդը տարբերվել է տարօրինակ վարքագծով, վարկած կա, որ հանցանքը կատարել է համակարգչային խաղի
ազդեցության տակ:
Ավելի վաղ՝ հայտնել ենք, որ ապրիլի 12-ին սպանվել է Արցախի Շահումյանի շրջանի բնակիչ, 2009թ. ծնված Վ. Գ.-ն: Հարուցված քրեական գործի շրջանակում ապրիլի 13-ին Վ.Գ.-ի սպանության կասկածանքով ձերբակալվել է նրա հարազատ եղբայրը` 2001թ. ծնված Ս.Գ-ն։ Նշանակվել են փորձաքննություններ, նախաքննությունը շարունակվում է։
Ի դեպ, ամիսներ առաջ համացանցում ակտիվորեն քննարկվում էր, թե կա վիրուսային ծրագիր, որը երեխաներին դրդում է սպանության, ինքնասպանության, խելագարության։ Այդ ժամանակ էլ «Մոմո» անունով անհասկանալի կերպարի կողմից ուղարկվող հաղորդագրությունները կապում էին այդ օրերին Օշականում ինքնասպանություն գործած 12-ամյա երեխայի դեպքի հետ։
Մոմոյի կերպարն իր մեջ վախեր է պարունակում և հենց դրանով են երեխաներին թիրախավորում, քանի որ երեխաները շատ են սիրում նման բաներ։ Խաղի քայլերի հաջորդականությունը երեխաներին տանում է ինքնասպանության, բարձրահարկ շենքերից ցած են նետվում։
