Թոշակից զրկված անձինք կստանան իրենց գումարները մինչեւ հարցին լուծում տրվի. Մանե Թանդիլյան

ՀՀ աշխատանքի եւ սոցիալական հարցերի նախարար Մանե Թանդիլյանը ֆեյսբուքի իր էջում գրառում է կատարել, անդրադարձել ազատամարտիկներին, զինվորականներին եւ նրանց ընտանիքի անդամներին տրամադրվող հաշմանդամության խմբի հետ կապված խնդիրներին, ինչպես նաեւ Բժշկասոցիալական փորձաքննություններում առկա համակարգային բացերին:

«Աշխատանքի եւ սոցիալական հարցերի նախարարությունը իմ կողմից գլխավորելու առաջին մեկ շաբաթվա ընթացքում, մայիսի 15-21-ին, կտրուկ ավելացել է նախորդ համեմատելի ժամանակահատվածում նախարարությանը եւ անձամբ ինձ հասցեագրված դիմումների քանակը՝ 3.5 անգամ, հասնելով 211 դիմումի։ Եվ սա ընդամենը մեկ շաբաթում, չհաշված սոցցանցերը։ Հարյուրավոր դիմումներ, բողոքներ, առաջարկություններ եմ ստանում նաեւ ֆեյսբուքի միջոցով։ Ակնհայտ են հասարակության դրական սպասումները՝ տարիների ընթացքում կուտակված խնդիրների լուծումները մարդկանց համար դարձել էին չկատարվող երազանքներ, եւ նոր իշխանությունից յուրաքանչյուր քաղաքացի սպասում է բոլոր խնդիրների շուտափույթ լուծում»,- գրառման մեջ նշել է Մանե Թանդիլյանը:

Նախարարը նշել է, որ անվերջանալի թվացող բոլոր խնդիրները պահանջում են արագ եւ արդյունավետ, որոշ դեպքերում՝ հեղափոխական, լուծումներ։ Եւ հավելել, որ սրանով է պայմանավորված իր անձնական ծանրաբեռնվածությունը՝ կապված քաղաքացիների ընդունելության, լրագրողների հետ շփման հետ. «Իմ քաղաքական գործունեությունը միշտ եղել է թափանցիկ, նախարարի պաշտոնում այդ ամենը լինելու է ավելի մեծ պատասխանատվությամբ: Մանե Թանդիլյանը, մասնավորապես  նշել է.

«Հարգելի հայրենակիցներ. Յուրաքանչյուր խնդրի ծանոթանալով անձամբ՝ ուսումնասիրել եմ նաեւ ազատամարտիկներին, զինվորականներին եւ նրանց ընտանիքի անդամներին տրամադրվող հաշմանդամության խմբի հետ կապված խնդիրը: Հսկողական փորձաքննության շրջանակներում հայտնաբերվել են դեպքեր, երբ հաշմանդամության խմբերը տրվել են առանց հիմնավորող փաստաթղթի, դիտարկվել են խախտումների այլ դեպքեր:

Բժշկասոցիալական փորձաքննության գործառույթներում առկա համակարգային խնդիրներից ելնելով, այսօր հանձնարարել եմ դադարեցնել հսկողական վերափորձաքննությունները եւ խախտումների վերաբերյալ փաստերը ուղարկել իրավապահ մարմիններին:  Միեւնույն ժամանակ, չարաշահումների արդյունքում վիճելի կարգավիճակում հայտնված անձանց մասով քննարկում են հնարավոր շուտափույթ լուծումները, որի արդյունքում այդ անձինք կշարունակեն ստանալ իրենց գումարները մինչեւ հարցին կտրվի ամբողջական եւ վերջնական լուծում:

Մենք հասկանում ենք, որ սոցիալապես անապահով յուրաքանչյուր քաղաքացու, ընտանիքի մեկ օր ավել աղքատությունը անընդունելի է, եւ անում ենք առավելագույնը արագ դրական արդյունքներ արձանագրելու համար»:

Եթե հավանեցիք այս գրառումը կիսվեք Ձեր ընկերների հետ.
GOOD LOOKING NEWS