Քիչ առաջ Նիկոլ Փաշինյանը Հանրային հեռուստաընկերության ուղիղ եթերում հայտարարեց իր հրաժարականի մասին. «Ես այսօր հրաժարական եմ տալիս ՀՀ վարչապետի պաշտոնից: Դրա նպատակը, սակայն, ձեր առաջ ստանձնած պատասխանատվությունից խուսափելլը չէ, այլ ընդհակառակը, մեր թավշյա հեղափոխությունն ավարտին հասցնելն, արտահերթ խորհրդարանական ընտրություններին հասնելը»,- ասաց Փաշինյանը:
Ապա նա ներկայացրեց հրաժարականից հետո սպասվելիք ընթացակարգը:
«Այս ողջ ընթացքում ես և կառավարության անդամները շարունակելու ենք իրականացնել մեր լիազորությունները: Ես շարունակելու եմ լինել ժողովրդի հաղթանակի լիազորը: Շատերը մտավախություն ունեն՝ իսկ եթե խորհրդարանական ուժերը վարչապետի ուրիշ թեկնածու առաջադրեն, արդյոք մենք պատրաստ ենք նման սցենարի:
Ժողովրդի կամքի առաջ չի կարող կանգնել ոչ մի ուժ: Ինչքան էլ հակասություններ ունենանք ԱԺ մի շարք ուժերի հետ, չեմ կարող մտածել, թե նրանք հակազգային հակապետական որևէ քայլերի կդիմեն: Մեր ժողովուրդն ու պետությունը կարմիր գիծ են թե ՀՀԿ-ի, թե ՀՅԴ-ի համար, նրանք այդ կարմիր գիծը երբեք չեն անցնի:
Դիմում եմ խորհրդարանական ներկայիս մեծամասնությանը. մենք ձեզ քննադատել ենք, բայց դա չի նշանակում, որ մենք ձեզ թշնամիներ ենք ընկալում: Ես Հայաստանում թշնամիներ չեմ ունեցել, չունեմ ու չեմ ունենալու: Չնայած այս հրաժարականը ֆորմալ բնույթ է կրում, բայց պահը հուզիչ է, որովհետև սրանով մենք ամփոփում ենք հեղափոխական փուլն ու մտնում նոր ժամանակաշրջան»:
Վերջում նա դիմեց ժողովրդին հետևյալ խոսքերով. «Ձեր բոլոր ցավերն իմ սրտում են, ձեր բոլոր կարիքներն ու երազանքները՝ իմ հոգում:
Ամեն ինչ շատ լավ է լինելու, պատրաստեք ձեզ նորանոր հաղթանակների, սիրում եմ բոլորիդ, խոնարհվում եմ բոլորիդ առաջ:
Եվ ուրեմն, կեցցե Ազատությունը, կեցցե Հայատանի Հանրապետությունը, կեցցենք մենք և եր երեխաները, որ ապրել ենք և վստահաբար ապրելու ենք ազատ և երջանիկ Հայաստանում»:
Հիշեցնենք՝ նախորդ շաբաթ «Ֆրանս 24» հեռուստաընկերությանը Փաշինյանն ասել էր, որ Աժ արտահերթ ընտրությունները տեղի կունենան դեկտեմբերի մոտավոր 9-ին-10-ին: «Եվ սրա համար ես պետք է հրաժարական տամ մինչև հոկտեմբերի 16-ը»,- նշել էր նա:
Ըստ ՀՀ Սահմանադրության՝ Աժ արտահերթ ընտրություններ անցկացնելու համար հարկավոր է, որ վարչապետի հրաժարականից հետո Ազգային ժողովը երկու անգամ չընտրի վարչապետի թեկնածու, ինչից հետո օրենսդիր մարմինը ցրվում է օրենքի ուժով, և նշանակվում են արտահերթ ընտրություններ։
