Ինչպե՞ս կազմակերպել մինչև մեկ տարեկան երեխայի խնամքն ամառվա շոգին: Ամռանը փոքրիկների համար ո՞ր հիվանդություններն են ավելի վտանգավոր, ի՞նչ անել՝ դրանք կանխարգելելու համար: NEWS.am Medicine-ի այս և այլ հարցերին պատասխանում է մանկաբույժ Մարի Դարակչյանը:
Ամռան սեզոնին ի՞նչ տեսակի ալերգիաներ կարող են առաջանալ մինչև 1 տարեկան երեխաների մոտ և ինչպե՞ս երեխային պաշտպանել նման ալերգիաներից:
Մինչև 1 տարեկան երեխաների մոտ առավել հաճախ դիտվում են մաշկի ալերգիկ ախտահարումները, որոնք սովորաբար չունեն սեզոնայնություն: Ալերգիկ ռինիտը, որն առավելապես դիտվում է գարնան և ամռան ամիսներին, չի ախտորոշվում մինչև 1 տարեկան երեխաների մոտ: Մանկաբույժների ամերիկյան ասոցիացիայի համաձայն՝ ալերգիկ ռինիտի ախտորոշման նվազագույն տարիքը 2 տարեկանն է, սակայն այն առավելապես ախտորոշվում է վաղ դպրոցական կամ նախադպրոցական տարիքում:
Ի՞նչ խնամք է անհրաժեշտ մինչև 1 տարեկան երեխային՝ ամռան ընթացքում զերծ պահելու համարցանկացած տեսակի հիվանդություններից:
Ամռան ընթացքում կարևոր է պահպանել մաշկի հիգիենան, երեխային լողացնել ամեն օր, իսկ շատ շոգ եղանակին՝ օրական 2 անգամ: Լոգանքը պետք է կազմակերպել մաքուր ջրով և մանկական լոգանքի գելով: Երեխային պետք է պաշտպանել արևի ուղիղ ճառագայթներից՝ հագցնելով գլխարկ, երկարաթև հագուստ և արևային ակնոց: Եթե երեխան բաց մարմնով արևի ճառագայթների տակ է, ապա պետք է օգտագործել արևապաշտպան քսուքներ:
Ամռանն ի՞նչ ջերմաստիճանային միջավայր է խորհուրդ տրվում մինչև 1 տարեկան երեխայի համար:
Սենյակի օպտիմալ ջերմաստիճան է համարվում միջինը 20 աստիճանը, սակայն հաշվի առնելով մեր տարածաշրջանի առանձնահատկութկունները, կարելի է առավելագույնն ունենալ 24 աստիճան: Եթե կա օդորակիչ, ապա դրա օգտագործումը ցուցված է շոգ եղանակին, քանի որ ջերմակարգավորման կենտրոնի անբավարար զարգացման հետևանքով երեխան կարող է սենյակի բարձր ջերմաստիճանի պատճառով ջերմել, առատ քրտնել, ջրազրկվել, հրաժարվել սնունդ ընդունել և զրկվել առողջ քնից:
Ի՞նչ պատվաստումներ պետք է ստանա ամռանը մինչև 1 տարեկան երեխան և ինչի՞ համար են դրանքհամարվում պարտադիր պրոցեդուրաներ:
Պատվաստումները շոգ եղանակին արվում են նույն սխեմայով, ինչ մյուս եղանակներին: Երբեմն մայրերին անհանգստացնում է երեխայի հնարավոր ջերմելը, ինքնազգացողության վատացումը, սննդից հրաժարվելը: Սակայն, ԱՆ խորհուրդների համաձայն, դրանք պատվաստումների հետաձգման համար ցուցում չեն: Այլ պատվաստումներ, կապված ամառվա սեզոնի հետ, չեն արվում:
Տարբերվո՞ւմ է, արդյոք, մինչև 1 տարեկան երեխայի սնունդն ամռանը: Եթե այո, ապա ինչո՞վ է դապայմանավորված:
Մինչև 1 տարեկան երեխաների սնունդը չի տարբերվում այլ սեզոններին տրվող սննդից: Հաշվի առնելով ջրազրկման մեծ հավանականությունը՝ պետք է կրծքով կերակրվող երեխային առավել հաճախ և երկար կերակրել, իսկ 6 ամսականից մեծ երեխաներին բավականաչափ կրծքի կաթ և ջուր տալ:
Շոգ եղանակներին կարո՞ղ է մինչև 1 տարեկան երեխաների մոտ առաջանալ դիսբակտերիոզ և ո՞րն է դրաբուժումը:
Դիսբակտերիոզ ախտորոշումը կլինիկական ախտորոշում չէ: Եթե կա փորլուծություն, փսխում, ջերմության բարձրացում, ապա պետք է դիմել մանկաբույժի, որի կողմից կտրվի ախտորոշում և կնշանակվի համապատասխան բուժում:
Ամռան ընթացքում մինչև 1 տարեկան երեխաների շրջանում ամենատարածված ո՞ր հիվանդոությունները կարող են հետք թողնել երեխայի օրգանիզմի վրա և հետագայում խնդիրներ առաջացնել:
Ամռան ընթացքում առավել հաճախ են ախտորոշվում աղեստամոքսային տրակտն ախտահարող հիվանդություններ՝ կապված մրգերի, բանջարեղենի առավել շատ օգտագործման, լողավազաններ, ծովափ, բաց ջրամբարներ հաճախելիության ավելացման հետ: Հաճախ դրանք արտահայտվում են լուծով, փսխումով, և այդ ամենը կարող է բերել ջրազրկման: Ջրազրկման կանխարգելման համար կարելի է օգտագործել օրալ ռեհիդրատացիոն լուծույթներ, ջուր, իսկ եթե երեխան կրծքով է կերակրվում, ապա հաճախակի կերակրել: Խնդիրներ նկատելու դեպքում պետք է հնարավորինս շուտ դիմել բժշկի, քանի որ ջրազրկումը կարող է առաջացնել անգամ կյանքին վտանգ սպանացող բարդություններ:
